IBDP距離正式開考還有4個月,有啲想要走捷徑嘅家長,會問我哋會唔會唔喺香港考IB會容易啲?因為普遍嚟講,香港畀人嘅感覺就係競爭好大,有得走就好走啦嘅感覺。估唔到呢個風氣都傳入咗部分國際學校。如果讀者係有呢個疑問,今次筆者呢篇可以幫到你了解更加多關於IB考試評核準則嘅標準。

【IB如何保持評分?】
IB係全世界少數容許考生來自世界各地,但係評分準則不變嘅考試制度。但係全世界咁多考生,IB究竟點樣評分,先可以保持水平一樣呢?當然,如果你講緊改IB數學卷,唔會有任何難度,因為大家都係對數字,最難嘅往往係寫作問題。

例如,英文要你根據Audience,Text, Purposes,Features去評論一篇文章嘅時候,同學點樣寫先可以畀7分?會唔會有個A考官覺得呢篇幾好就畀7分,另一個嚴格嘅B考官,唔好彩嘅學生就可能只攞到6分。其實,IB成個評核過程相當嚴謹。為咗確保評分標準統一,IB會畀考官做五份同一科目嘅操練卷,確保考官熟悉點樣評分,而操練卷全部都已經由資深嘅考官打分並且寫上評語,供新進嘅考官參考。考官完成操練卷後,IB會要求佢哋再做五份測試卷,測試卷即係考官需要改卷,但係今次冇資深考官評分從旁協助,如果最後打分都達標,就可改真正試卷。如果唔合格呢?IB評分組長會畀考官改善意見後,考官須多改五份測試卷,一直改到達標先可以正式幫學生閱改,過程非常嚴謹。所以,家長喺美國考IB,同喺香港考,其實分別不大。

【IB每年有3份卷】
由於IB全世界有考試,美國、英國同香港有時差,如果某啲時區嘅學生,考完咪可以串通另一個時區嘅學生?例如香港考完,同美國學生講。由於香港同美國相差12小時,IB特登出另一份時區(timezone)嘅卷,所以你會見到IB考試卷後嘅編碼,總係有TZ1,TZ2,意思即係Timezone 時區1,時區2。TZ1 就係畀美國嘅學生,而TZ2就係畀亞洲嘅學生,包括香港,防止大家串通。順帶一提,IB澳洲大考係11月,仲有一個時區就係TZ 0,學生見到呢份卷,即係專屬澳洲嘅試卷。但係唔好覺得,我係香港考生,就唔做澳洲,美國時區嘅考試卷,因為佢哋有極大嘅參考價值。你諗吓,如果出亞洲卷嘅考官,佢點都唔可以攞返舊時TZ2嘅卷照抄,反而佢會睇TZ0,TZ1其他考官出嘅題目作為參考。筆者教育中心,之前就見到好幾份近年嘅IB考試題目,係攞咗舊時04,07年嘅試題照抄。所以同學溫咗呢啲題目,袋定有備無患。

【IB限制年齡】
IB唔似DSE、A level ,你鍾意幾時考都得,30歲走去考都可以。但係IB限制咗學生報考嘅年齡,最大個都係19歲左右,而且一定要經過學校考,無得自行報考。其中一個好大嘅原因,可能係保持IB考試嘅認受性,公平性同標準性。如果一個讀咗30年書,畢生準備IB考試,佢好有可能考得好過晒IB考生,但係其他IBDP嘅考生,只係得最後兩年讀書。所以,如果全部超齡嘅學生去報考IB,可能令IB嘅評分準則產生不公平嘅現象,所以IB學生如果考得唔好,係無翻身嘅機會。

2019年1月1日

Edward
HKExcel IB Specialist共同創辦人,教育超過三千名IB學生
拔萃男書院畢業生,英國高考取得5A成績
曾獲邀到多間IB學校分享應試心得
曾撰寫「IB攻略」在書展大賣

On.cc 原文

Categories: ON.CC

Leave a Reply

Your email address will not be published. Required fields are marked *

× Wtsapp/致電6365 7481登記免費試堂